Gregors Žmuida pīdzyma Ostronē 1921. goda 11. septembrī. Jō mōtei Matiļdei i tāvam Ontonam beja seši bārni, divi myruši mozeni. Izgleiteiba Gregoram beja nalela - tikai četrys klasis. Bet, nasaverūt iz tū, puika beja vyspuseigi apdōvynōts. Iergeļu spēli jis apgiva pašmōceibys ceļā. Dīveņš jam deve taidys dūteibys, ka spēlēt iz varganim jis saprota piec nūtim.

 Jis sovys dzeivis laikā ir spieliejs kaidōs 20 bazneicōs: Ostronis, Viļānu, Vydsmuižys, Pīneņu, Rībeņu, Preiļu, Atašīnis, Stiernīnis, Borkovys, Nagļu, Varakļōnu, Cyskoda, Ondrupinis i.c.

 Jō īcīneits transporta leidzeklis beja ritiņs, ar kura paleidzeibu jis apmeklēja dīvnomus, lai spālātu, taipoš tū dareja kōzu i bieru ceremonejōs, nūsadorbō ar nūšu pōrraksteišonu sovim daudzajim dzīdōtōjim. Strōdōja krejōtovā.

 Kara laikā beja īsaukts Padūmu armejā dorba bataljonā, atsagrīzs turpynōja kolpūt par iegerļnīku.

 Gregors beja ari lobs zeimātōjs. Kolhoza laikā strādōja par mōkslinīciskū nūformātōju. Jis zeimēja ari cylvāku portretus. Apsaprecēja 1958. godā. Laulōjōs Prezmūs. Ar sīvu Genovefu izaudzynōja meitu Marutu i dālu Andri. Gregors beja atsauceigs i izpaleidzeigs sovim sābrim. Jī lobim vōrdim pīmiņ Gregoru i na veļti vēļ tagad jūs ausīs skaņ jō skaistais bols, latiņu volūdā kūpā ar prīsteri dzīžūt ekzekvejis voi ari "Libera me, Domine!

 Myužeibys ceļūs Gregors Žmuida devēs 2010. goda 11. janvarī. Apglobōts Ostronis draudzis kopūs.

Valentina Murāne, mōsa.

Katōļu Dzeive 5' 2010